068r - - - - - Tables fantasques
Tu peulx faire divers compartiments encoches & dans
iceulx mectre des poissons pains sur du carton simple au naturel
& avecq couleurs & sil te semble sur du papier argente & bruny
qui representera lescaille Et apres couvrir cela de corne de
lanterne bien claire Cela mesmes peulx tu apliquer en aultres
ouvraiges
Planter abres
Il les fault planter en lieu sec temps sec & assembler force
terre au pied tout aultour comme une motte affin que les pluyes
ne remplissent les fosses & ne nyent les abres
Gect
Jay essaye 4 sortes de sables pour le plomb & estain La croye
Le verre pile Le tripoly & le linge brusle touts 4 fort
excellents Mays quand a la croye il fault quelle soict de la plus
doulce que tu pourras trouver comme est celle de champaigne dont
usent les painctres elle despouille fort net ne veult poinct estre
humectee de magistra ne daulcune chose Ains toute seiche en son
naturel subtillement pulverise Le premier gect est tousjours plus
nect Touteffois il en soustiendra bien deulx ou trois Mays il ny a
que le premier Il fault que tu advises quand tu vouldras
refaire ton moule au chassis de prendre nouvelle pouldre de croye
qui naye point este mise en oeuvre car celle qui ha servy au chassis
est desseichee & nha pas tant de prise & liayson que la recente
Le verre pile se peult faire en sable de verre commun touteffois
le cristallin est plus excellent Car le commun ne tient que du verre
sel de salicor Mays le cristallin tient du sel de tartre & de salicor
tout ensemble qui touts deulx servent a la fusion Le verre estant
calcine & reduit comme a sa premiere matiere Or pour le calciner
parfaictement Gectes tes lopins de verre quel quil soit entre les plus
gros charbons allumes que tu pourras si aultre commodite t de foeut
violent te default Et lors quil sera bien rouge gecte le dans leau
at left middle margin
La potee est
estimee excellente
pour ces deulx
metaulx
[continued]