067r - - - - - [continued]
jour, arrache du bout des ongles les poils qui font
la poincte trop longue, et jusques à ce que la poincte te
semble bien & que tu y remarques les poils de rat qui sont
touts noirs & le poil de menue gris est blanchastre
a la despuys la racine jusques au milieu. Quand il
sera à ta fantasie, lie b et sarre bien fort avecq du
filet en deulx endroicts, puys couppe le superflu
& l’adapte à un tuyau de grosseur qui luy soict
convenable, de canard ou de corbeau pour les petits.
Les bons pinceaulx sont ceulx qui, estant trempés
dans l’eau, ne font point de ventre si tu en trasses
sur la main.
Huile
Tout huile qui s’embreve au papier & en chaufant
s’evapore au foeu & laisse le papier net, comme la tourmentine
& huile d’aspic, est bonne à faire vernis.
Sable
Toute chose broyée & destrempée soufle, selon
aulcuns.
Four à souflets
Plustost qu’i mectre le metal, il fault qu’il soit
rouge au fonds comme un charbon & bien enflambé.
Aprés tu l’emplis, & couvre le charbon & ajouste les
souflets, aultrement le metal de dessus se fondroit
par le moyen des souflets & le fonds seroit caillé &
refroidy & ne courroit pas. Mays si tu procedes en
ceste sorte, tu fondras tout ce qu’il te plaira.
Vernis sur papier
Les Allemands font des boictes p couvertes de papier painct & le vernissent
de glaire d’oeuf meslée de gomme & d’un peu d’huile, non d’aspic, mays
d’un aultre odorant qui semble huile d’olif. Tout ouvrage faict avecq
glaire soubstient l’huile. C’est avecq cela que les painctres trompent les
pauvres paysans, paignant leurs bandes de taffetas avecq ceste glaire,
pour avoyr plustost faict. Mays la premiere pluye emporte tout.