067r - - - - - [continued]
jour arrache du bout des ongles les poils qui font
la poincte trop longue Et jusques a ce que la poincte te
semble bien & que tu y remarques les poils de rat qui sont
touts noirs & le poil de menue gris est blanchastre
a la despuys la racine jusques au milieu Quand il
sera a ta fantasie lie b Et sarre bien fort avecq du
filet en deulx endroicts puys couppe le superflu
& ladapte a un tuyau de grosseur qui luy soict
convenable de canard ou de corbeau pour les petits
Les bons pinceaulx sont ceulx qui estant trempes
dans leau ne font point de ventre si tu en trasses
sur la main
Huile
Tout huile qui sembreve au papier & en chaufant
sevapore au foeu & laisse le papier net comme la tourmentine
& huile daspic est bonne a faire vernis
Sable
Toute chose broyee & destrempee soufle selon
aulcuns
Four a souflets
Plustost qui mectre le metal il fault quil soit
rouge au fonds comme un charbon & bien enflambe
Apres tu lemplis & couvre le charbon & ajouste les
souflets Aultrement le metal de dessus se fondroit
par le moyen des souflets & le fonds seroit caille &
refroidy & ne courroit pas Mays si tu procedes en
ceste sorte tu fondras tout ce quil te plaira
Vernis sur papier
Les allemands font des boictes p couvertes de papier painct & le vernissent
de glaire doeuf meslee de gomme & dun peu dhuile non daspic mays
dun aultre odorant qui semble huile dolif Tout ouvrage faict avecq
glaire soubstient lhuile Cest avecq cela que les painctres trompent les
pauvres paysans paignant leurs bandes de taffetas avecq ceste glaire
pour avoyr plustost faict Mays la premiere pluye emporte tout