064r - - - - - Nettement travailler
Ne poses jamays, si tu peulx, deulx couleurs l’une sur l’aultre.
Mays aprés curieusement faict ton desseing, garde la place
des ombres seules pour eulx mesmes, & des jours & rehaulssements
aussy particulierement, sans coucher tout à plat d’une couleur &
puys rehaulsser ou bien ombrer sur icelle. Et en ceste sorte,
tu advances ta besoigne, espargnes les couleurs & travailles
nettement. Qui est cause que, les couleurs n’estant poinct brouillées ne
meslées ensemble, elles ne meurent poinct, & tu adoulcis mieulx les
couleurs, ne se trouvant pas si espesses.
Huile gras
Elle n’est pas bonne à travailler de couleurs, pource qu’elle les
rend espesses & aussy difficilles à travailler que l’azur
desmail. Use doncq du plus cler huile de noix que tu pourras
& du plus frais.
Vermeillon
Il ne le fault pas tenir en l’eau estant tremper broyé à l’huile, car
il pert sa couleur. Il est mieulx de choisir du vermeillon
blanchastre que obscur & noirastre. Car communement le vermeillon se
mesle avecq un peu de laque, sans laquelle il ne seroict gueres
different du minium. Mays le pasle jecte plus de vivacité que
l’obscur. Il n’est pas desiccatif & pour ceste occasion, on y mesle
du cristallin calciné.
Couleurs à huile dans l’eau
Communement aprés les avoyr broyées, on mect une fo lopin de
foeille d’estain dessus & on les mect dans l’eau pour les garder
de seicher. Mays cela est plus propre pour la ceruse, blanc de
plomb, minium & massicot que pour les aultres. Car la laque
y meurt & perd sa couleur, le vermeillon azur aussy.
Double couche
Le vert de gris ne se meurt poinct & ainsy n’a point besoing d’estre couché
deulx foys. Mays la laque & aultres, & principallement la carnation,
le requierent deulx couches. Les couleurs ne changent gueres
quand elles sont seiches.
at left top margin
** Ocre
jaulne **
Il en fault un
peu en toute
carnation.
at left middle margin
** Adoulcir **
On adoulcist
de mesme sur
le papier huilé
que sur le bois.
Mays il est
plus aysé
d’adoulcir sur la toile,
pource que l’adoulcissement
y doist estre
plus rude.
at left bottom margin
** Oeil **
Tout oeil doibt
suivre le rond
du compas & non pas
estre plat & quarré.