Making and Knowing
A minimal edition of BnF Ms Fr 640

[TOC] | [translation]

- - - - - folio image: 064r - - - - -

Nettement travailler

Ne poses jamays si tu peulx deulx couleurs lune sur laultre
Mays apres curieusement faict ton desseing garde la place
des ombres seule pour eulx mesmes & des jours & rehaulssements
aussy particulierement sans coucher tout a plat dune couleur &
puys rehaulsser ou bien ombrer sur icelle Et en ceste sorte
tu advances ta besoigne espargnes les couleurs & travailles
nettement qui est cause que les couleurs nestant poinct brouillees ne
meslees ensemble elles ne meurent poinct & tu adoulcis mieulx les
couleurs ne se trouvant pas si espesses

Huile gras

Il nest pas bon a travailler de couleurs pourcequils les
rend espesses & aussy difficilles a travailler que lazur
desmail
Use doncq du plus cler huile de noix que tu pourras
& du plus frais

Vermeillon

Il ne le fault pas tenir en leau estant tremper broye a huile car
il pert sa couleur Il est mieulx de choisir du vermeillon
blanchastre que obscur & noirastre Car communement le vermeillon se
mesle avecq un peu de laque sans laquelle il ne seroict gueres
different du minium Mays le pasle jecte plus de vivacite que
lobscur Il nest pas desiccatif & pour ceste occasion, on y mesle
du cristallin calciné

Couleurs a huile dans leau

Communement apres les avoyr broyees on mect une fo lopin de
foeille destain dessus & on les mect dans leau pour les garder
de seicher mays cela est plus propre pour la ceruse blanc de
plomb
minium & massicot que pour les aultres Car la laque
y meurt & perd sa couleur le vermeillon azur aussy

Double couche

Le vert de gris ne se meurt poinct & ainsy na point besoing destre couche
deulx foys Mays la laque & aultres & principallement la carnation
le requierent deulx couches Les couleurs ne changent gueres
quand elles sont seiches

at left top margin

** Ocre
jaulne
**

Il en fault un
peu en toute
carnation

at left middle margin

** Adoulcir **

On adoulcist
de mesme sur
le papier huile
que sur le bois
Mays il est
plus ayse
dadoulcir sur la toile
pourceque ladoublcissement
y doibt estre
plus rude

at left bottom margin

** Oeil **

Tout oeil doibt
suivre le rond
du compas & non pas
estre plat & quarre