063r - - - - - Couleur d’amaranthe
Encores qu’on la die immortelle, si est ce que le vin blanc
luy oste sa taincture & s’en rend clairet, & aprés
la fleur seichée se trouve blanche. Note qu’ainsy le vin, &
je l’ay p esprouvé. L’eau de vye en faict aultant.
Desiccation d’huile
Si l’huile ne deseiche poinct, mects dedans du massicot
& minium. Il n’y a poinct meilleur huile que de noix, car elle ne
deseiche point trop tost ne trop tard.
Gect
Les Allemans usent du plomb de Flandres, pource qu’il est fort
douls. Et pour mieulx gecter ilz prennent de la mine de plomb & le
fondent, & separent ce qui est fondu de la crasse & mine, & le versent
dans un vaisseau à part, puys le fond en font leur gect. Car il
ne fault pas que le plomb soict esté mis en oeuvre, ains soict
tout noeuf. Aulcuns gectent dans des formes de fer & de cuivre.
at left middle margin
ou du plomb
venant noeuf
de la mine. Ilz
le fondent
deulx foys
dans un creusol.
Par la premiere
il le purgent de
la crasse. A la
seconde ilz en
font gect.
Umbres
Les painctres allemans font leurs ombres des carnations
des hommes avecq du geyct broyé, du scudegrun & de l’ocre.
Bistre
Il ne s’employe qu’à destrempe, & d’iceluy il se faict couleur
de boys.
Verdegris et aultre tres beau vert
gay
Il ne le fault pas broyer avecq l’eau seule, car cela le
faict mourir. Aulcuns, pour le rendre beau à destrempe,
le broyent avecq du vinaigre, mays cela le faict pallir
& venir blanchastre. Pour le rendre beau, broyes le avecq
urine & laisses seicher. Puys, quand vous vouldrés, broyés
le à huile. Et aprés que vous l’aurés recuilly avecq la pallete,
plustost qu’achever de nettoyer le mabre, broyés y du
scudegrun. Et vous aurés un trés beau vert.