062r - - - - - Perspectives
Les perspectives sont longues à huile à cause de plusieurs
traicts qu’il fault faire avecq la reigle, et pour ceste
cause on les faict communement à destrempe. On prend les poincts
à discretion. Le principal de ce gist à avoyr la cognoissance
du poinct. On en faict communement deulx ou trois, quelques
fois cinq.
Ocre
Il s’en mect aulx visaiges, aulx cheveulx, aulx testes de mort et
rochers.
Hommes et animaulx esloignés
On les faict premierement a la grossiere de gris ou de pourpre, qui est de cendre
d’azur & de laque. Estants secs, on rehaulsse & acheve de carnation & autres
couleurs & de blanc. Et il
se montre mieulx & est plustost
faict que de blanc & de noir.
Les armees
se peignent
ainsy.
Pourtraire
Aprés que tu as imprimé ton tableau & raclé avecq un
costeau pour le rendre bien uni, tu commenceras à
portraire avecq le plus long charbon que tu pourras, car
avecq un court tu ne verrois pas si bien ton traict & le
ferois grossier. Que le charbon aye la poincte desliée,
& affin de ne la rendre bientost obtuse & mousse, traine
la poincte de plat, ainsy tu l’aiguiseras tousjours. Tiens
aussy ton charbon le plus long que tu pourras & fais le
& acoustume toy af à faire le traict leger. Car si tu t’acoustumes
de pourtraire delicatement avecq le charbon, tu feras de mesme
avecq les couleurs. Et qui est grossier au charbon n’est jamais
exquis aulx couleurs. Et par un traict de charbon, les maistres
font jugement de leurs aprantis. Fais premierement la circonference
de ton pourtraict, c’est à dire le contour, legerement & sans
trop curieulx travail, ains hardiment. En ce faisant, tu
t’aprendras d’estre artiste, et s’il te fault deffaire quelque
chose tu ne perdras pas tant de temps que si tu l’avois
elabouré. Aprés, recherche tous les traits particuliers, & ne
te tiens pas trop sur ton tableau, ains parfoys recule
t’en pour mieulx juger de la proportion. Après que le premier
dessein te semblera bien, resuis tous les traits au pinceau
avecq de la rose ou aultre couleur a gomme ou destrempe.
Ainsi tu travailleras plus seurement aulx couleurs & avecq moings de
peine.