062r - - - - - Perspectives
Les perspectives sont longues a huile a cause de plusieurs
traicts quil fault faire avecq la reigle Et pour ceste
cause on les faict communement a destrempe On prend les poincts
a discretion Le principal de ce gist a avoyr la cognoissance
du poinct On en faict communement deulx ou trois quelques
fois cinq
Ocre
Il sen mect aulx visaiges aulx cheveulx Aulx testes de mort et
rochers
Hommes et animaulx esloignes
On les faict premierement a la grossiere de gris ou de pourpre qui est de cendre
dazur & de laque Estants secs on rehaulsse & acheve de carnation & autres
couleurs & de blanc Et il
se montre mieulx & est plustost
faict que de blanc & de noir
Les armees
se peignent
ainsy
Pourtraire
Apres que tu as imprime ton tableau & racle avecq un
costeau pour le rendre bien uni Tu commenceras a
portraire avecq le plus long charbon que tu pourras car
avecq un court tu ne verrois pas si bien ton traict & le
ferois grossier Que le charbon aye la poincte desliee
& affin de ne la rendre bien tost obtuse & mousse traine
la poincte de plat ainsy tu laiguiseras tousjours Tiens
aussy ton charbon le plus long que tu pourras & fais le
& acoustume toy af a faire le traict leger Car si tu tacoustumes
de pourtraire delicatement avecq le charbon tu feras de mesme
avecq les couleurs Et qui est grossier au charbon nest jamais
exquis aulx couleurs Et par un traict de charbon les maistres
font jugement de leurs aprantis Fais premierement la circonference
de ton pourtraict cest a dire le contour legerement & sans
trop curieulx travail ains hardiment En ce faisant tu
taprendras destre artiste Et sil te fault deffaire quelque
chose tu ne perdras pas tant de temps que si tu lavois
elaboure Apres recherche tous les traits particuliers & ne
te tiens pas trop sur ton tableau Ains par foys recule
ten pour mieulx juger de la proportion Apres que le premier
dessein te semblera bien resuis tous les traits au pinceau
avecq de la rose ou aultre couleur a gomme ou destrempe
Ainsi tu travailleras plus seurement aulx couleurs & avecq moings de
peine