Making and Knowing
A minimal edition of BnF Ms Fr 640

[TOC] | [translation]

- - - - - folio image: 061r - - - - -

[continued]

et lunissent bien puys et estant bien seiche deseignent leur pourtraict
& couchent leur naturelle carnation laissant le lieu des ombres
comme le couste du front & de la joue & lentour des yeulx vuide
& a sec jusques a ce quilz ayent remply le reste Apres ilz mectent
a part leurs ombres lesquelz ilz ne font pas si obscurs ains ce
que le naturel peult faire En somme ilz ne mectent poinct umbre
sur carnation ne carnation sur umbre Ains blanc sur blanc
& noir sur noir Ainsy & chascun apart soy en ceste sorte leur
ouvraige est net & les couleurs ne se meurent poinct

Carnations

Il ten fault faire de deulx sortes lune plus rouge pour
faire la principale couche laultre plus pale pour les
rehaulssements comme lentour des yeux Et puys sur ceste
derniere carnation tu toucheras legerement les principaulx
jour dun peu de blanc de plomb Mays garde den mectre
trop car cela feroit sembler un visaige de mort La belle
laque de florence faict une belle carnation vifve retirant
au tent de la rose alexandrine & incarnadine

at left top margin

@ Certaines
couleurs ne veulent
estre broyees
comme le minium et
le massicot
Les cendres
ne veulent
aulcunement
estre broyees

Arrondir

Si tu veulx faire bien relever arr adoulcis les choses
rondes en arrondissant avecq la poincte du pinceau & le
reste de plat
sil est plat & ainsy des aultres selon leur
naturel & legerement avecq la poincte du pinceau sec & aplati
& avecq patience

Blanc de plomb

Sans cestuy la tu ne peulx travailler en petit en quoy il fault
avecq grande curiosite adoulcir Or tu ne le peulx faire avecq
la ceruse pourceque elle nha pas asses de corps

Jours

Ton pinceau te le monstre faisant ombre qui doibt tousjours
suivre le derriere de ta main non pas de droicte ligne comme
ainsy

Figure Figure car le jour seroict trop crud & trop rude Mays
obliquement & comme en pante ainsy Figure Figure Il fault que le
tableau ne soict pas de front contre le jour Mays
a demy tourne contre iceluy Et sur tout
cherche le jour doulx Car il faict lombre & ouvrage doulx comme le jour
rude louvrage rude