058r - - - - - [continued]
@Il fault faire pour le moingts trois couches de carnations pour achever
les visaiges à huille. Et au commancement on mect le noir et unbre où il
convient. Apprés, le rehaulssement de blanc de plomb ne se doibvent mectre
sur le noir. Les carnations et où entre la ceruse en cinq ou
six moys jaulnissent, mais le blanc de plomb ne se change poinct.@
La laque de Florence est meilleure que celle de Flandres,
car à Florence se font les meilleures tainctures. Pour faire
belle carnation, la laque la plus rouge & plus vive est la meilleure,
car celle qui tient du purpurin & violet par la mixtion de trop
d’alum faict la carnation comme d’un qui ha grand froit. C’est
pourquoy les dames, se voulant colorer les joues, broyent
de la laque de Florence bien subtillement, puys en remplissent
un peu de cotton, lequel aprés elles envellopent dans un peu
de toile de Cambray qui est claire, et ainsy elles poncent
la laque sur la joue & puys, avecq une aultre cotton net,
elles adoulcissent.
Le cristallin estant broyé à eau semble estre avoyr corps,
mays à huile il n’en ha point. Il se broye avecq la laque
& avecques l’aspalthe, qui ne seicheroient de fort long temps sans
cela.
L’huile d’aspic se mect communement avecq le blanc de plomb, dnon
pas tout pur mays meslé avecq un peu d’aultre huile de noix.
Ladicte huile d’aspic ne seroit pas bonne avecq la laque &
couleurs qui n’ont point de corps, car elle les feroit esclater, mays avecq ceulx qui hont corps
& sont aulcunement grasses, elle est bien propre.
Le verd de gris et l’orpiment se doibvent premierement broyer avecq urine
plustost que les delayer à huile. Ainsy ilz sont beaulx & ne se meurent
poinct.