058r - - - - - [continued]
@Il fault faire pour le moingts trois couches de carnations pour achever
les visaiges a huille Et au commancement on mect le noir et unbre ou Il
convient appres le rechaulssement de blanc de plomb ne se doibvent mectre
sur le noir Les carnations et ou entre la ceruse en cinq ou
six moys jaulnissent Mais le blanc de plomb ne se change poinct@
La laque de florence est meilleure que celle de flandres
Car a florence se font les meilleures tainctures Pour faire
belle carnation la laque la plus rouge & plus vive est la meilleure
Car celle qui tient du purpurin & violet par la mixtion de trop
dalum faict la carnation comme dun qui ha grand froit Cest
pourquoy les dames se voulant colorer les joues broyent
de la laque de florence bien subtillement Puys en remplissent
un peu de cotton lequel apres elles envellopent dans un peu
de toile de cambray qui est claire Et ainsy elles poncent
la laque sur la joue & puys avecq une aultre cotton net
elles adoulcissent
Le cristallin estant broye a eau semble estre avoyr corps
Mays a huile il nen ha point Il se broye avecq la laque
& avecques laspalthe qui ne seicheroient de fort long temps sans
cela
Lhuile daspic se mect communement avecq le blanc de plomb dnon
pas tout pur mays mesle avecq un peu daultre huile de noix
Ladicte huile daspic ne seroit pas bonne avecq la laque &
couleurs qui nont point de corps car elle les feroit esclater Mays avecq ceulx qui hont corps
& sont aulcunement grasses elle est bien propre
Le verd de gris et lorpiment se doibvent premierement broyer avecq urine
plustost que les delayer a huile Ainsy ilz sont beaulx & ne se meurent
poinct