057v - - - - - Gainier
Les Gainiers se servent de petites peaulx d’aigneaulx et
chevreaulx fort deliées quasi comme parchemin et les tiennent en lieux
humides tousjours remoulhées. Quand ilz veulent imprimer quelque
histoire, ils les couchent dans les creus de leur figure, puys mectent
par dessus de la terre grasse fine de laquelle on desgresse les draps
, laiant bien prescé & battue & rendue moyenement humide et molle.
Puis posent sur la terre une petite tablette unye et mectent le tout
en une presse et l’y laissent seicher. Apprés la terre, seulement le
cuyr demeure nectement emprainct de la grosseur d’un poix.
Et lors tu donnes au cuyr deux ou trois couches l’une apprés
l’aultre de noir de couperose et escaille de fer. Egalle comme les
taneurs font. Et ceste taincture, estant astringente, faict reserrer le
cuir & le fortifie et le faict mieux empraindre. Estant sec, on colle
par le revers de la toille aveq de la colle forte. En ceste sorte on
peult promptement imiter de grandes statues & de fort subtille
medailhe et les paindre & estoffer, & sont legieres et portatives
& de longue durée. Ce qui s’emprainct sur ung relief se faict aultrement
et se resuict aveq ung fer chault.
Painctre
Creons bons ne se font aveq colle bonne mays aveq laict de
femme.
Les images faictz de carton se doibvent, estant secs, tremper dans la
rousine fondue fort delayée et claire. Cela la fortifie, aultrement ilz
deviennent mols en temps humide.
Les masques de Venise se font aveq le creulx & le visaige masle de
cuyvre.
Les Flamens n’emploient poinct aultre blanc aux carnations à huille
que le blanc de plomb, pource que la ceruse jaulnist.
L’huille de noix de 4 ou 5 ans qui est cler est la meilheure couleur,
garde de poulsiere. Celuy qui est recentement tiré aveq la presse
en forme d’huille d’amendes est blanc, mesmement si la peau des noix
est tirée.
[continued]