057r - - - - - [continued]
La laque est longue à seicher à huile et pour ceste occasion
il fault parmy broyer du verre. Mays il fault choisir du
cristallin pource qu’il est plus net. Et pource qu’il seroit trop malaisé
de soy mesme à broyer, il le fault faire rougir au feu, puys
tout rouge le gecter dans de l’eau froide, & il s’esmiettera & pulverisera
aysement pour aprés le broyer. @ Estant bien broyé il avecq force eau,
il semble blanc de plomb broyé, mays pour cela il n’ha point de corps.
Je croy qu’il seroit bon pour le gect.
@ Le blanc de plomb se faict de lame de plomb battue subtile & mise
soubz le fumier.
Le vernis blanc de tourmentine ou d’huille d’aspic et de tourmentine
se colore aveq de la terra emerita pulverisée, la faisant bouilhir ensemble.
Il donne couleur d’or sur l’argent et plus beau s’il est bruny. Il est sec
en ung quart d’heure. L’aloé feroit bien plus couleur haulte, mais il est long
à seicher & l’aultre est sec en ung quart d’heure, l’yver aussi bien que l’esté.
La bonne lacque mouillée de salive se rend promptement obscure. Celle de
Florence est trop gommée.
Si tu fais couche d’encre d’imprimeur sur du velours et y aplicque or de
feuille et puis estire le velours, il se monstrera grené comme si s’estoit pouldre
d’or semée dessus.
Le vermillon broyé de soy mesme est blaffart et palle, mays broyé
aprés la laque, il est plus beau.
Pour desgraisser les mabres, on y broye de la cendre commune,
laquelle est bonne aprés pour faire la premiere impression
d’un tableau qui se prepære à huile affin de boucher les fissures
& rimes du boys. Elle ha plus de corps que la croye & ha
certaine croye graisse. On la mesle avecq ladicte croye ou
ra avecq les couleurs ramassées du vaisseau où l’on nettoye les
pinceaulx. Elle est desiccative et espargne des couleurs. Sur
Ceste premiere impression faicte sur le boys, on racle avecq
un costeau pour l’unir. Aprés on y faict une seconde impression
de cerusse ou meschantes couleurs meslées. En un tableau à huile sur toile, on ne
faict qu’une impression, et la mesme cendre y peult servir.
Aprés aussy qu’on ha broyé une couleur, on y broye de la mie de
gros pain pour desgraisser le mabre.