Making and Knowing
A minimal edition of BnF Ms Fr 640

[TOC] | [translation]

- - - - - folio image: 057r - - - - -

[continued]

La laque est longue a seicher a huile Et pour ceste occasion
il fault parmy broyer du verre Mays il fault choisir du
cristallin pourcequil est plus net Et pourcequil seroit trop malaise
de soy mesme a broyer Il le fault faire rougir au feu puys
tout rouge le gecter dans de leau froide & il sesmiera & pulverisera
aysement pour apres le broyer @ Estant bien broye il avecq force eau
il semble blanc de plomb broye Mays pour cela il nha point de corps
Je croy quil seroit bon pour le gect

@ Le blanc de plomb se faict de lame de plomb battue subtile & mise
soubz le fumier

Le vernis blanc de tourmentine ou dhuille daspic et de tourmentine
se colore aveq de la terra emerita pulverisee la faisant bouilhir ensemble
Il donne couleur dor sur largent et plus beau sil est bruny Il Est sec
en ung quart dheure Laloe feroit bien plus couleur haulte Mais Il est long
a seicher & laultre est sec en ung quart dheure lyver aussi bien que leste

La Bonne lacque mouillee de salive se rend promptement obscure Celle de
florence est trop gommee

Si tu fais couche dencre dimprimeur sur du velours et y aplicque or de
feuille
et puis estire le velours Il se monstrera grene comme si sestoit pouldre
dor
semee dessus

Le vermillon broye de soymesme est blaffart et palle Mays broye
apres la laque il est plus beau

Pour desgraisser les mabres on y broye de la cendre commune
laquelle est bonne apres pour faire la premiere impression
dun tableau qui se præpare a huile affin de boucher les fissures
& rimes du boys Elle ha plus de corps que la croye & ha
certaine croye graisse On la mesle avecq ladicte croye ou
ra avecq les couleurs ramassees du vaisseau ou lon nettoye les
pinceaulx Elle est desiccative et espargne des couleurs Sur
ceste premiere impression faicte sur le boys on racle avecq
un costeau pour lunir Apres on y faict une seconde impression
de cerusse ou meschantes couleurs meslees En un tableau a huile sur toile on ne
faict quune impression et la mesme cendre y peult servir
Apres aussy quon ha broye une couleur on y broye de la mie de
gros pain
pour desgraisser le mabre