056r - - - - - Trempe excellente pour corps de
cuirasse
Ayes eau de riviere, la plus claire & la plus courante
qu’il sera possible, & fais la chaufer un peu plus que tiede.
Puys ayes une botte de gaulde & en prens la grene & la
mects dans ladicte eau & la fais fort bouillir, la remuant
avecq un baston, puys verse la dans un muy ou aultre
vaisseau, puys gectes dedans deulx picotins de sel.
Aprés prenés un grand chaulderon de ladicte eau de
riviere & la faictes chaufer un peu plus que tiede. &
prenés de la terre grasse rouge, trois ou quattre joinctées,
destrempés la & la gectés dans le chaulderon avecq ladicte
eau. Prenés aultant de fiente de pigeon que de ladicte
terre & aultant de fiante de cheval & aultant de limaille
de fer, & le tout destrempés separement & le gectés dans le
chaulderon & la laissés deulx ou trois jours. Puys la gectés
aprés dans ledict muy, et remués le tout fort ensemble.
Et tant plus ceste trempe sera vielle, tant mieulx vauldra.
Vernis pour destrempe
Tu peulx fayre du mabre à destrempe de laque ou rose
de Gand & de croye. Estant sec, glacer de laque destrempée
en vin, car la colle la faict mourir & noircir. Et tout se monstrera aprés
rouge, mays le vernis que tu y mettras, qui penetrera, fera
monstrer obscur & clair ce qui le debvra estre. Le vernis
se faict ainsy, mesle avecq tourmentine claire de Venise
de l’huile d’aspic & jusques à ce que le tout soit assés cler
& liquide, & il se faict sans feu. Cestuy es cy est pour
les choses à destrempe, et le vernis de tourmentine que
tu sçais, pour les tableaux. Levernis pur d’aspic n’est
pas bon pour les tableaulx, car l’huile d’aspic est trop
penetrant & faict petiller les couleurs, s’il n’est de long temps
faict.