056r - - - - - Trempe excellente pour corps de
cuirasse
Ayes eau de riviere la plus claire & la plus courante
quil sera possible & fais la chaufer un peu plus que tiede
Puys ayes une botte de gaulde & en prens la grene & la
mects dans ladicte eau & la fais fort bouillir la remuant
avecq un baston puys verse la dans un muy ou aultre
vaisseau puys gectes dedans deulx picotins de sel
Apres prenes un grand chaulderon de ladicte eau de
riviere & la faictes chaufer un peu plus que tiede &
prenes de la terre grasse rouge trois ou quattre joinctees
destrempes la & la gectes dans le chaulderon avecq ladicte
eau Prenes aultant de fiente de pigeon que de ladicte
terre & aultant de fiante de cheval & aultant de limaille
de fer & le tout destrempes separement & le gectes dans le
chaulderon & la laisser deulx ou trois iours puys la gectes
apres dans ledict muy Et remues le tout fort ensemble
Et tant plus ceste trempe sera vielle tant mieulx vauldra
Vernis pour destrempe
Tu peulx fayre du mabre a destrempe de laque ou rose
de gand & de croye Estant sec glacer de laque destrempee
en vin car la colle la faict mourir & noircir Et tout se monstrera apres
rouge Mays le vernis que tu y mettras qui penetrera fera
monstres obscur & clair ce qui le debvra estre Le vernis
se faict ainsy mesle avecq tourmentine claire de venise
de lhuile daspic & jusques a ce que le tout soit asses cler
& liquide & il se faict sans feu Cestuy es cy est pour
les choses a destrempe Et le vernis de tourmentine que
tu scais pour les tableaux Le vernis pur daspic nest
pas bon pour les tableaulx car lhuile daspic est trop
penetrante & faict petiller les couleurs sil nest de long temps
faict