055r - - - - - Pour tirer d’un schioppo senza
rumore
Chaufe bien le tuyau & bouche la lumiere d’embas
& ayes un lopin de suin de porceau le plus frais que tu pourras,
long comme la joincture du petit doigt & du qualibre, & le mects
dans le tuyau & le promene de hault en bas jusques à ce
qu’il soict tout fondu. Aprés charge, avecq une douille qui se
tiene à la verge, le tuyau en hault, comme tu sçais, & il ne fera
qu’un petit siflement.
Pour tremper bale qui faulcera
et sera de difficile guarison
Mesle du suin & de fort vinaigre, & dans ceste mixtion
gecte ta balle toute chaulde.
Contre playes
Perce un poulet ou chien pour essayer, & mects dans la
playe du suc & de l’herbe pillée qui s’appelle semperviva,
c’est de ceste petite qui ha la foeille comme petits grains, qu’aulcuns
apellent vermicularis. Et on tient pour asseuré qu’il ne mourra
point.
Onenev elbirro tnaut is no ehcram
rus enu elbat uo ueirse ueirtse
Ayes au moys de juing & juillet nombre des plus gros escargots
que tu pourras avecq leur coquille, mects les dans une bouteille
de verre avecq nombre suffisant de jaulne d’oeufs fort durs
& fort cuits, avecq bon vinaigre. Bouche bien le tout & le
mects soubs le fiens de cheval l’espace de quinze jours.
Les escargots vivront premierement des jaulnes d’oeufs, puys avecq
la chaleur sortiront de leur coquille & mangeront & vivront d’icelle.
Enfin il s’en fera un onguent blanc, lequel, sans descouper la
bouteille tu mec que sur toutes choses pour ta seurté tu btiendras
bien bouchée, tu mectras au soleil bien fort & au serain, l’espace
[continued]