054v - - - - - Figure
Pour faire seicher les confictures ayes une qui ne sont liquides,
ayes une tine percée des deulx costés d’une petite fenestre quarrée,
& par icelles passe des bastons d’une part & d’aultre, & sur iceulx
pose un crible faict de fisselles en forme de ret. Et là dessus
tu colloqueras proprement les vaisseaulx de tes confictures. Et ayant
mis au fonds de la tine un rechault ou deulx, couvre la tine
avecq un linceulx en double.
Pour fayre suivre un cheval
+Il luy fault donner du pain sucré, & il cognoistra celuy
qui luy fera ce bien.
Et pour le mainctenir en bonne disposition de cheminer, mects le
fais luy prendre un bon train des le commancement du chemin & le
continue.
Chiens
Pour les garder de mordre, il est bon d’avoir des pelottes
de gemme acoustrée comme celle des cordonniers & leur gecter comme ilz
te jappent, & ilz mordront tellement les pelottes qu’ilz s’empasteront
les dents & ne te pourront nuire.
Pour desguiser un cheval
Luy coupper les oreilles & la queue, & avecq de la paille
allumée luy faire griller le poil de la teste & ailleurs.
Bottes de foin
Par faulte de bottes, tu peux faire de la corde de foing & t’en
entourner les jambes, & jamays la pluye ne passera.