054v - - - - - Figure
Pour faire seicher les confictures ayes une qui ne sont liquides
ayes une tine percee des deulx costes dune petite fenestre quarree
& par icelles passe des bastons dune part & daultre & sur iceulx
pose un crible faict de fisselles en forme de ret Et la dessus
tu colloqueras proprement les vaisseaulx de tes confictures Et ayant
mis au fonds de la tine un rechault ou deulx Couvre la tine
avecq un linceulx en double
Pour fayre suivre un cheval
+Il luy fault donner du pain sucre & il cognoistra celuy
qui luy fera ce bien
Et pour le mainctenir en bonne disposition de cheminer mects le
fais luy prendre un bon train des le commancement du chemin & le
continue
Chiens
Pour les garder de mordre il est bon davoir des pelottes
de gemme acoustree comme celle des cordonniers & leur gecter comme ilz
te jappent & ilz mordront tellement les pelottes quilz sempasteront
les dents & ne te pourront nuire
Pour desguiser un cheval
Luy coupper les oreilles & la queue & avecq de la paille
allumee luy faire griller le poil de la teste & ailleurs
Bottes de foin
Par faulte de bottes tu peux faire de la corde de foing & ten
entourner les jambes & jamays la pluye ne passera