051v - - - - - [continued]
qui est different de celuy des imprimeurs. Il fault faire long
temps bouillir de l’huile de noix ou, pour mieulx, de l’huile de
lin. & ayant long temps bouilly, tu y mectras des aulx &
des croustes de pain pour les desgraisser, & laisseras encores
fort bouillir, puys enfin y mectras une partye du noir
de lampe que tu auras broyé avecq de l’huile auparavant
sur le marbre. Et enfin le mesleras tout, tant & jusques à ce
que tu voyes que la planche imprime bien. Laquelle Et
comme tu y auras couché l’ancre, essuye bien les planches avecq
la superficie d’une foeille de papier blanc. & fais ainsy
jusques à ce que le papier se monstre net, puys imprime.
Si tu essuyois les planches avecq un linge, il osteroit l’ancre.
L’huile de lin s’espessist en bouillant & vient comme un vernis, & est
dangereulx de s’enflammer. Partant, quand tu le feras bouillir, fais
que ce soit en lieu descouvert ou en lieu où la flamme ne puisse
porter domaige. Aulcuns font brusler du tartre jusques à ce
qu’il soict noir, & le broyent avecq de l’huile de lin non bouilly
ou huile de noix, que d’aultres trouvent meilleur. Ce noir est
beau, mays celuy de fumée de lampe est plus noir. Quand
tu veulx imprimer fr, prens avecq le bout du doigt dudict noir
mediocrement espés, toute la planche premierement nettoyée en lessive
comme dict, puys avecq la superficie d’un papier blanc frotte la
jusques à ce que le papier demeure blanc. & ne la touches pas
de la main nue, pourceq mays un papier apliqué par—dessus.
& ayant nettoyé parfaictement la mi planche, frotte encores d’un papier,
redouble les bords & costés. Aprés, ayes une petite table unye
& sur icelle une piece de feultre, puys quelques foeilles de papier
& enfin celle que tu veulx imprimer, qui soit humectée entre deulx
servietes mouillées. Et sur ceste foeille, mects ta planche, puys
d’aultre papier & enfin ung aultre foeultre. Puys, passe entre
les rolleaulx. Et tu peulx imprimer une douzaine de pieces
de suicte en chargeant tousjours la planche d’ancre & la nettoyant,
comme tu as faict. Mays si tu desistes d’imprimer, le reste de
l’ancre se sechera dans les traicts de la planche. Ainsy, il te
la fauldra faire bouillir en lessive ou urine, comme est jà dict,
pour la nettoyer. Les rouleaux ne doibvent pas estre trop lasches.