Making and Knowing
A minimal edition of BnF Ms Fr 640

[TOC] | [translation]

- - - - - folio image: 051r - - - - -

Contretirer

Fais de leau de savon & dicelle frotte & humecte la piece de taille
doulce que tu veulx contretirer puys pose dessus du papier blanc
& frotte par dessus bien fort avecq une dent ou un cul de verre
& tu emporteras ta piece imprimee Il est vray quelle sera a gauche
Mays si tu huiles ton papier dhuile daspic & ou de tourmentine
il te le representera a gauche droicte de laultre coste Suys
doncq ces traicts avecq un pinceau ou une plume puys chaufe
le papier & lhuile sen ira & laissera ton papier blanc Et si
tu veulx que cela ne se cognoisse poinct si par cas fortuict tu
as emprunte la piece Mouille le papier et le pollissement qua
faict le brunissouer au revers qui faict apercevoir ce qui a este
faict ne se cognoistra point Leau de savon faict jaulnir
la piece Mays leau bien gommee qui ha le mesme effaict ne le
faict poinct Si tu veulx fais pour cest effect eau gommee
puys y destrempe du savon & fais comme dict est

Tailleurs en planches

Pour nettoyer les planches de cuivre ou pour mieulx faire
imprimer celles qui sont usees Fais les bouillir en bonne lessive bien consumee a la buee
quattre ou cinq bonnes heures puys fais ton ancre avecq
huile de lin & non avecq huile de noix & presse avecq les rouleaus
Les planches de cuivre sont plus tost faictes que les planches
de boys
Mays elles ne sont pas si propres a promptement
imprimer Celles de boys sont penibles Et aussy auront plustost
imprime vint foeilles que laultre deulx Pour tailler en boys
le secret est de pocher premierement Cest a dire de coucher la
piece contretiree ou desseignee sur la planche de boys & faire
que le coste du traict soict colle sur le bois Estant sec
tu viens a legerement frotter dun mouchouer mouille le revers
du papier qui en frottant se rendra si subtil quil ne demeurera
presque que le traict lequel apres on suict en taillant le fonds
Tu pourrois faire cela au verres histories & couche de
noir destaille pour apres esgratigner & coucher tes couleurs
sur le descouvert Pour faire lancre pour planches de cuivre

at left bottom margin

Ces rouleaus
sont bons pour
imprimer promptement
avecq des
cartons tailles
diverses sortes
de pastes

at left bottom margin

On peult mectre
les planches parmy
le linge quand la lexive est bien affinee ou bien dans un pot

[continued]