050r - - - - - Garder fruict tout lan
Recipe une ampoule de verre capable à l’ouverture de recepvoir
des cerises et prunes ou selon le fruit que vous voulés.
Mectés dedans de l’eau chaulde l’espace de deux heures.
Et quand l’eau sera refroidie, jectés la & la tournés
la gueule en bas sur une table & bien unie, & dans une
chambre où il n’y aye aulcune goutte d’air & de vent. Puys
en praeparés un tapon de cire noeufve entourné de toile
encirée, et l’adjoustés à l’ampoulle bien justement affin qu’il
soict tout prest à boucher quand vous y aurés mis le fruit.
Et quand vous aurés cueilly delicatement avecq la main le
fruict sans qu’il soit corrompu & en jour chault & sec, retirés
vous dans la chambre bien close, où il n’y entre point de vent
ne d’air, & le mectés doulcement & avecq dexterité dans la
bouteille. Puys tapés bien la bouteille avecq le tapon
& lutés, & faictes lut s’il vous semble de chaulx vive &
huile, & en sorte que l’eau n’y entre point. Puys mectés
vos bouteilles dans une pone pleine d’eau l’esté Et lhiver
pourceque la cave s dans une cave, et l’hiver mectés vos
bouteilles dans un panier garny de quelque poix & le descendés
au fonds d’un puys profond. Car l’hiver l’eau de la pone
seroit trop froide si la cave n’est bien chaulde, car il
fault que l’eau soit comme l’eau de riviere.
Mouler
Si promptement tu veulx mouler quelque chose de demy relief
qui te vient en main, plies du papier en cinq ou six doubles
& le poses sur la medaille, & fais que le papier se replie par
derriere la medaille affin qu’il soict bien asseuré. Aprés ayes un
baston large par un bout & poinctu par l’aultre, bien adoulcy,
et frotte fort sur le papier, & avecq la poincte du baston resuicts
les traicts, & y procede jusques à ce que tu cognoisses que ton
empraincte soict bien faicte. Puys à ta commodité frotte
legerement d’huile avecq un pinceau lemp l’empraincte de papier
et gectes y suif ou cire ou soufre, & le papier, sans se
brusler, te rendre ton pourtraict nect, que tu pourras aprés
mouler en plastre ou tripoly, et puys en plomb & aultre metal.
at left bottom margin
Le carton poly
guere espés & un
peu humecté est
propre. Puys, si tu
veulx, fortifie le
de papier collé
par derriere.