049r - - - - - Gect de plomb
Ceulx qui gectent ces petits ouvrages qui se vendent devant
les eglises, y fondent une sur une lb d’estaim, demy de plomb,
& gectent en pierre, & s’ilz veulent leur ouvrage plus blanc, ilz
mectent la p moictié d’estain & moictié de plomb, mays la premiere
mixtion est la meilleure & ne soufle poinct. Il la fault gecter
assés chault, car aultrement elle ne couleroit pas. Aulcuns fument leur
moulle avecq une chandelle de rousine pour gecter nect. L’antimoyne
faict la matiere brusque & rompante. L’estain de glace faict
l’ouvraige plus blanc, mays non pas plus coulant, quand à l’estain,
s’i faict bien a les au plomb pur. Ceulx qui font les gects
de plomb bien nects se servent de poinçons. Les pintiers gectent
en moulle de cuivre. On dict qu’on faict prendre le plomb sur le
verre avecq de la rousine. Aulcuns mectent sur le plomb un quart
d’estain. L’estain de glace rend l’ouvrage plus fort.
at left top margin
Poncet
Ils gectent de
souldure de quoy
les pintiers vitriers se servent.
Loppe de fer
Coquille de fer huitre
calcinée.
Sable pour gect de plomb
Cendres de paille de seigle bien bouillie puys sechée & bien
tamisée. L’alier avecq glaire d’oeuf. On y peult getter cuivre, letton
et aultres.
Aultre
Pierre ponce bruslée & calcinée. Os de seiche bruslés & calcinés,
aultant d’un que d’aultre, & cendres de noyer ou de vigne bien bouillie,
seichée & subtillement tamisée, alié avecq glaire d’oeuf.
Pintiers
Ils mectent sur un quintal d’estaim fin une lb d’estaim de glace qui
rend l’estaim plus espés. Il y a de deulx sortes d’estain, l’un d’eulx
presque comme plomb qui coule mieulx, l’aultre aigre qui se rend
plus espés. Ils gectent en moules d’estaim massif & espés ou pour
faire plus nect en moules de cuivre gravés au burin ou en pierre ou
en terre. Les retailles de letton meslées ne rendant l’estain que plus
rompant & plus dur & difficille à travailler, ils gectent dans leurs moules
fort chaults & comme roug & l’estain fort chaulx. Ils parfument
leurs moules d’estain de chandelle de rousine.
L’estain dou aigre se trouve meslé parmy les saulmons, aysé
à couper, mays difficille à mectre en œuvre & fonte s’il n’est meslé
parmy l’aultre doulx. Et sans cela, il viendroit à deschet.