048v - - - - - Extraction de regulus
Recipe une lb dantimoyne demy lb savon noer et demy lb
de tartre de montpellier Le tout pulverise fault faire
bouillir dans un pot de terre verny a grand foeu en remuant
le tout souvent avecq une broche de boys ou de fer & ledict
savon se consumera et bruslera Et le restant demeurera comme rouge
Et fauldra que cella se diminue pour un tiers Puys fault
gecter cella sur le carreau Et sera noirastre Ce quil fauldra
par quattre ou cinq foys fondre et verser sur le quarreau
en platte Et lors aures le regulus tire de lantimoine
Aultres pulverisent lantimoine & le meslent avecq salpestre
& tartre pulverise aultant dun que daultre & ayant faict rougir
un pot ou crusol en mectent un peu a chasque fois & se tournent
le dos de peur de la fumee Et continuent ainsy jusques a ce que
tout y soict mis Et fortifient le foeu jusques a ce que tout soit
bien fondu & le refondent plusieurs foys
Plomb Estaim
Ilz sesgrissent estant souvent ou long temps remis a fondre
et se spessissent et se bruslent De sorte que mesmes quand on
font un saulmon lestaim sespessit au fonds si en gectant on ne
le remue souvent Il est mieulx pour gecter de fondre peu de
plomb & le ou destaim & le remuer renouveller a chasque fonte
Lantimoyne les rend frangibles Lestain de glace les
blanchist On Les pintiers mectent sur lestaim fin une lb destaim
de glace sur un quintal destain fin & deulx lb & demye ou
trois lb de cuivre rouge & doulx de chauldron Qui est
meilleur que le letton Il y a estaim fin & doulx & estaim
aigre Laigre se gecte en grille par les pintiers pour
mieulx le vendre O Ilz viennent mieulx & plus net en moulles
de pierre quen moule de cuivre pourceque le cuivre est gras
& attire sinon quon chaufe fort le molle On quon gecte
grand ouvraige Trois quarts de plomb sur une lb destaim
doulx faict une ligne fort liquide & propre au gect & qui ha
lustre comme mirouer Laxunge de verre les esclarcist
Et toutes choses qui esclarcissent fort les metaulx & leur oste
lespesseur & nature dense & les rend comme liquides comme eau
les rend propres au gect Car cest lespesseur qui les garde de
courre Lestaim doulx est plus uny com que laigre qui est plus
blanc et semble estre bruny comme un mirouer.
at left bottom margin
Pour bien allier lestain & le plomb Il en fault fondre un tout seul
Et puys y mesler laultre a petits lopins a chasque foys et le
gecter souvent sur le mabre ou quarreau Et lors que tu le verras
venir bien uny comme & luisant comme sil estoit bruny il est bien Car
quelque foys il vient tache pour trop de plomb & quelque foys pour
trop destaim Il y a de lestain qui porte plus de plomb lung que laultre
Lestaim commun est celuy qui est mesle de plomb