047v - - - - - Boisson ayant goust de vin
Ayes du tartre des grands vaisseaulx & les destrempe
en eau & il aura goust de vin.
Fonte
Aulcuns pour faire couler net mectent moictié metal &
moictié cuivre. Aultres prenent une partye de potin &
une partye de cuivre letton. Aultres prenent du letton de
chandeliers une partye, & une partye de letton de bassine.
Et entre les bassines, le letton des grandes est plus aigre
que celuy des poilons, pource que pour donner le tour de la
rondeur ainsy court, il fault que la matiere soit plus
doulce. Aulx grandes, ausquelles ilz prenent le tour de la
rondeur plus ample, la matiere se peult prendre plus aigre.
Tant y a que le letton le plus aigre coule mieulx & jecte
plus net, mays quil soict gecté fort nect chault. On Comme
on veult gecter, on gecte sur la matiere du plomb qui faict
couler & courre & s’en va en fumée, & garde que le moule ne se
corrompt pas. Et si tu veulx gecter pieces de foeu, mesles y
plus de rosette que de letton affin qu’il soict moings frangible.
Les crusols pour fondre le metal doibvent estre meilleurs
que pour les verriers, car le verre n’est pas si pesant
que le metal. Et pour ceste occasion il fault luter de terre
et verre pilé les crusols.
Creusets
Ceulx qui se font en hyver & temps humide ne sont pas
bons. Ceulx des fondeurs doibvent estre espés et se doibvent
lutter.
Gect
La pierre ponce calcinée subtillement gecte l’or de 22 carats
sans reparer, mays il fault qu’elle soict enflammée et rouge
comme le metal. Et elle endure plusieurs gects.