047v - - - - - Boisson ayant goust de vin
Ayes du tartre des grands vaisseaulx & les destrempe
en eau & il aura goust de vin
Fonte
Aulcuns pour faire couler net mectent moictie metal &
moictie cuivre Aultres prenent une partye de potin &
une partye de cuivre letton Aultres prenent du letton de
chandeliers une partye & une partye de letton de bassine
Et entre les bassines le letton des grandes est plus aigres
que celuy des poilons pourceque pour donner le tour de la
rondeur ainsy court il fault que la matiere soit plus
doulce Aulx grandes ausquelles ilz prenent le tour de la
rondeur plus ample la matiere se peult prendre plus aigre
Tant y a que le letton le plus aigre coule mieulx & jecte
plus net Mays quil soict gecte fort nect chault On Comme
on veult gecter on gecte sur la matiere du plomb qui faict
couler & courre & sen va en fumee & garde que le moule ne se
corrompt pas Et si tu veulx gecter pieces de foeu mesles y
plus de rosette que de letton affin quil soict moings frangible
Les crusols pour fondre le metal doibvent estre meilleurs
que pour les verriers Car le verre nest pas si pesant
que le metal Et pour ceste occasion il fault luter de terre
et verre pile les crusols
Creusets
Ceulx qui se font en hyver & temps humide ne sont pas
bons Ceulx des fondeurs doibvent estre espes et se doibvent
luter
Gect
La pierre ponce calcinee subtillement gecte lor de 22 carats
sans reparer Mays il fault quelle soict enflamme et rouge
comme le metal Et elle endure plusieurs gects