047r - - - - - Pour les dents
Sel armoniac i ℥, sel gemme 1 ℥, alum demy ℥. Fais
eau par la cornue, et de si peu que tu en toucheras la dent,
le tartre & noirceur s’en ira. Il est vray qu’il est de mauvaise
odeur, mays tu le peulx mesler avecq miel rosat & un peu
d’huile de girofle ou canelle.
Huile d’antimoine
Elle jaulnist bien fort, mesmes l’argent, si tu le poses sur iceluy
estant chaufé.
Contre mal caducq ou vertige
Porte pendue au col de la racine de pæonia qui soict
cuillie au descroissant de la lune.
Creusets
Ceulx de Bayonne qui semblent estre de grés sont meilleurs,
car ilz durent sans comparaison plus que les aultres. Et pource qu’ilz
ne sont gueres espés, on gaste moings de charbon à la fonte de l’or
& argent car ilz sont incontinent eschaufés. Ilz ne supent pas tant
l’argent que les aultres & pour ceste occasion il ne s’y trouve gueres
de laveures. Ilz ne sont pas aussy si subgects à se verser que les
aultres qui ont le pied plat.
Contre diarrhœe et dysentherie
Contre la diarrhœe il est tres bon d’user de la conserve
de symphitum, aultrement consolida maior. Et si c’est contre
la dissenterie, tu peulx avecq cella frotter les temples, le creulx
des mains & la plante des pieds d’huile de cire & en prendre
une goutte ou deulx avecq une cuellerée de bouillon. La racine
de consolida maior pilée & mise entre des pieces coupeures en
une piece de boeuf puys bouillie les reunist, à ce qu’on dict.