045v - - - - - Charger arquebus
Il fault que tu ayes diverses charges selon la portée
que tu vouldras donner à ton harquebus, qui ayent toutes
par le bout une vis qui entre dans l’ancrou de la verge
de ladicte harquebus. Quand doncq tu auras mis la pouldre
dans la charge qui est dans l’ancrou, tiens ta verge droicte.
Et levant ton harquebus droicte, emboicte ladicte verge
jusques à ce que la charge soict au fonds de l’harquebus,
puys redresse l’harquebus la bouche du canon en hault,
et tire la vergette. Ainsy ta pouldre sera entierement
à la culasse sans qu’aulcun grain ou poulsiere
d’icelle soict attaquée aulx costés de l’harquebus, qui
ha tousjours quelque crasse ou chambre. Ainsy
elle ne repoulsera poinct, et tireras plus justement.
Figure
Pour adjouster un canon faulcé
Oste la culace et le pose sur une table bien unie & bien
posée à plomb et passe par le dedans un filet sans noeuds &
bien uni, à chasque bout duquel il y aye un plomb qui pende
de chasque costé. Puys regarde dans le canon le long du
filet, et s’il ne touche esgalement partout, remarque l’endroict
où il ne touche poinct & fais fraper d’un marteau par dehors
de ce costé & au mesme lieu & ainsy il se redressera, &
fais ainsy tout aultour.