Making and Knowing
A minimal edition of BnF Ms Fr 640

[TOC] | [translation]

- - - - - folio image: 045v - - - - -

Charger arquebus

Il fault que tu ayes diverses charges selon la portee
que tu vouldras donner a ton harquebus qui ayent toutes
par le bout une vis qui entre dans lancrou de la verge
de ladicte harquebus Quand doncq tu auras mis la pouldre
dans la charge qui est dans lancrou tiens ta verge droicte
Et levant ton harquebus droicte emboicte ladicte verge
jusques a ce que la charge soict au fonds de lharquebus
puys redresse lharquebus la bouche du canon en hault
Et tire la vergette Ainsy ta pouldre sera entierement
a la culasse sans quaulcun grain ou poulsiere
dicelle soict attaquee aulx costes de lharquebus qui
ha tousjours quelque crasse ou chambre Ainsy
elle ne repoulsera poinct Et tireras plus justement

Figure Figure

Pour adjouster un canon faulce

Oste la culace et le pose sur une table bien unie & bien
posee a plomb et passe par le dedans un filet sans noeuds &
bien uni a chasque bout duquel il y aye un plomb qui pende
de chasque coste puys regarde dans le canon le long du
filet et sil ne touche esgalement par tout remarque lendroict
ou il ne touche poinct & fais fraper dun marteau par dehors
de ce coste & au mesme lieu & ainsy il se redressera &
fais ainsy tout aultour