044v - - - - - Tamis de poil de cheval
Ils se font à Coustance en Normandie de poil de la queue de cheval,
qu’ilz nettoyent avecq de la lessive à cause qu’ilz les trient avecq
la bouche & en separent les courts & rompus. Ils ne font
pas la lame plus longue que le tamis, & est ronde. Ils attachent
par les deulx extremités de la lames le poil ou blanc ou noir,
selon l’ouvrage qu’ils veulent faire. Et est est faicte la trame
dessus & dessoubs comme pour faire quelque aultre tyssu. Et
passant entre deulx un petit baston plat large de ii ou trois doitgs,
ilz passent aprés deulx poils à chasque frapement de marche et
tissent avecq trois marches. Il y a en tout le tamis xvii^(c) poils.
Ils les vendent à douzaines & chascune xxx sols. Ils les portent
jusques à Tholose pour les transporter aprés en Espaigne, et
prenent en eschange de l’estamine de soye.
Excellente eau contre la peste, de monsieur de Montorsin
Prens theriaque, rue & dictam & bon vinaigre, mects
tout dans une bouteille de verre, la laissant à demy ouverte
& bien sellée, et la mects en bain fort lent trois ou 4 jours.
Puys separe ta decoction de la residence, de laquelle en temps
de besoing tu verseras sur un quarreau rouge enflammé & en
recepvras la vapeur, & en parfumeras aussy tes vestements. C’est
un secret fort rare & esprouvé.
Huile blanc somnifere
Prens x ou 12 pommes de mandragore. Mects les à
quartiers dans de l’huile d’olif, le tout dans une phiol bouteille
de verre, laquelle tu poseras au bain marie par deulx jours,
et ton huile viendra blanc. Duquel si tu frottes un peu la
plante des pieds, tu auras bientost envye de dormir.
Stuc
Aulcuns, pour coller pierre, n’employent pas la poi gemme &
poix resine noire, pource qu’elle est trop grasse, mays prenent
de la rousine & du soufre, aultant que d’un que d’aultre, &
aultant de cire que de tous deulx, et y meslent de la brique
pilée pour le plus fort. Aultres, de la croye blanche ou pierre
blanche pilée & pulverisée & tamisée.