044v - - - - - Tamis de poil de cheval
Ils se font a coustance en normandie de poil de la queue de cheval
quilz nettoyent avecq de la lessive a cause quilz les trient avecq
la bouche & en separent les courts & rompus Ils ne font
pas la lame plus longue que le tamis & est ronde Ils attachent
par les deulx extremites de la lames le poil ou blanc ou noir
selon louvrage quils veulent faire Et est est faicte la trame
dessus & dessoubs comme pour faire quelque aultre tyssu Et
passant entre deulx un petit baston plat large de ii ou trois doitgs
ilz passent apres deulx poils a chasque frapement de marche Et
tissent avecq trois marches Il y a en tout le tamis xvii^(c) poils
Ils les vendent a douzaines & chascune xxx sols Ils les portent
jusques a Tholose pour les transporter apres en espaigne Et
prenent en eschange de lestamine de soye
Excellente eau contre la peste / de monsieur de montorsin
Prens Theriaque rue & dictam & bon vinaigre mects
tout dans une bouteille de verre la laissant a demy ouverte
& bien sellee Et la mects en bain fort lent trois ou 4 jours
Puys separe ta decoction de la residence de laquelle en temps
de besoing tu verseras sur un quarreau rouge enflamme & en
recepvras la vapeur & en parfumeras aussy tes vestements cest
un secret fort rare & esprouve
Huile blanc somnifere
Prens x ou 12 pommes de Mandragore mects les a
quartiers dans de lhuile dolif le tout dans une phiol bouteille
de verre laquelle tu poseras au bain marie par deulx jours
Et ton huile viendra blanc duquel si tu frottes un peu la
plante des pieds tu auras bien tost envye de dormir
Stuc
Aulcuns pour coller pierre nemployent pas la poi gemme &
poix resine noire pourcequelle est trop grasse Mays prenent
de la rousine & du soufre aultant que dun que daultre &
aultant de cire que de tous deulx Et y meslent de la brique
pilee pour le plus fort Aultres de la croye blanche ou pierre
blanche pilee & pulverisee & tamisee