043v - - - - - Vin diversifié et transmué
Raclés du bresil bien menu, mectés le tremper une ou deux
heures dans eau claire, puys prenés ceste eau taincte &
adjoustés y de l’eau claire & vous ferés deu vin si clairet
qu’il vous plaira. Estant à vostre plaisir, mectés y une goute
de just de citron ou d’orange, & incontinent il viendra blanc.
Il s’en peult boire sans danger.
Perles
On dict que le talc pulverisé souflé dedans à la lampe
les rend ainsy.
Harquebusier
Pour tirer justement de ton harquebus, il fault que le bout
de la culasse soict & vienne justement sur le bort de la lumiere,
pource qu’en ceste sorte la pouldre sans soufler prend & se brusle
tout à coup & ha plus de force & ne repousse poinct. Au contraire
si la culasse est eschancrée, comme communement elles font, la pouldre prend
plustost en cet endroict, faict repousser & soufle. Ce que demonstre
bien une harquebus chambrée, qui repousse plus qu’une aultre.
Et pource que le canon est plus gros à la culasse qu’à la gueule,
les mires sont aussy inegales, car celle de la culasse est plus
haulte que celle de la gueule. Et puys l’espesseur du canon emporte
sur le calibre environ une ligne et la mire une aultre. Il fauldroit
doncq faire ou le canon tout d’une grosseur ou eslever le fust
sur par le bout & vers la gueule & l’enfoncer & abaisser vers la
culasse. Le poix de la pouldre doibt estre la tierce partie de la
basle.
Dragee d’harquebus
Si tu veulx qu’elle aille ensemble, pose dessus une piece
de feultre ou cuir ou papier, selon la distance, & que la piece
soict avecq un portepiece justement coupée selon le qualibre
de l’harquebus.