043v - - - - - Vin diversifie et transmue
Racles du bresil bien menu mectes le tremper une ou deux
heures dans eau claire puys prenes ceste eau taincte &
adjoustes y de leau claire & vous feres deu vin si clairet
quil vous plaira Estant a vostre plaisir mectes y une goute
de just de citron ou dorange & incontinent il viendra blanc
Il sen peult boire sans danger
Perles
On dict que le talc pulverise soufle dedans a la lampe
les rend ainsy
Harquebusier
Pour tirer justement de ton harquebus il fault que le bout
de la culasse soict & vienne justement sur le bort de la lumiere
pourcequen ceste sorte la pouldre sans soufler prend & se brusle
tout a coup & ha plus de force & ne repousse poinct Au contraire
si la culasse est eschancree comme communement elles font la pouldre prend
plus tost en cet endroict faict repousser & soufle Ce que demonstre
bien une harquebus chambree qui repousse plus quune aultre
Et pourceque le canon est plus gros a la culasse qua la gueule
les mires sont aussy inegales Car celle de la culasse est plus
haulte que celle de la gueule Et puys lespesseur du canon emporte
sur le calibre environ une ligne et la mire une aultre Il fauldroit
doncq faire ou le canon tout dune grosseur ou eslever le fust
sur par le bout & vers la gueule & lenfoncer & abaisser vers la
culasse Le poix de la pouldre doibt estre la tierce partie de la
basle
Dragee dharquebus
Si tu veulx quelle aille ensemble pose dessus une piece
de feultre ou cuir ou papier selon la distance & que lea piece
soict avecq un porte piece justement coupee selon le qualibre
de lharquebus