042v - - - - - Poncis pour esgratigner sur le
satin
Aprés que tu as poncé avecq de la farine ou croye broyée,
affin que les poincts du poncis ne s’effacent, suys la trace
avecq de la glaire battue avecq du laict ou escorce de figuier,
ce qui la fera incontinent esclarcir comme eau, & sans faire
corps elle gardera la trace, que resuivras & esgratigneras
avecq d un lopin de verre ou trancheplume.
Toile pour paindre à huile
sans se rompre
Affin que ton pourtraict à huile ne se rompe & gaste poinct
en le pliant, fais ta couche avecq miel huile, un peu d’huile
& eau & farine.
Paindre à huile sur taffetas qui
Affin que l’huile ne coure poinct, fais ta couche premiere
avecq miel, eau d’alum & eau d’amydon.
Sable de gect
Le principal est de le bien broyer sur le mabre & qu’il soit
impalpable, & meslé un peu d’albastre calciné.
Pour pourfiler un portraict
Suis les traicts avecq de la laque broyée avecq
huile d’olif, qui ne sechera poinct.
Vernis blanc sur le plastre
Donne deulx ou trois mains de colle bien blanche pour
paindre. Aprés vernis de vernis de sandarache, huile
d’aspic et un peu de mastic. Et le mectre au soir dedans
un vaisseau tout ensemble bien pilé, sans foeu, qui le
feroit venir jaulne. Puys avecq un pinceau, il est sec
incontinent. Coule l’huile qui aura pris la substance.