042v - - - - - Poncis pour esgratigner sur le
satin
Apres que tu as ponce avecq de la farine ou croye broyee
affin que les poincts du poncis ne seffacent suys la trace
avecq de la glaire battue avecq du laict ou escorce de figuier
ce qui la fera incontinent esclarcir comme eau & sans faire
corps elle gardera la trace que resuivras & esgratigneras
avecq d un lopin de verre ou trancheplume
Toile pour paindre a huile
sans se rompre
Affin que ton pourtraict a huile ne se rompe & gaste poinct
en le pliant fais ta couche avecq miel huile un peu dhuile
& eau & & farine
paindre a huile sur taffetas qui
Affin que l’huile ne coure poinct fais ta couche premiere
avecq miel eau dalum & eau damydon
Sable de gect
Le principal est de le bien broyer sur le mabre & quil soit
impalpable & mesle un peu dalbastre calcine
Pour pourfiler un portraict
Suis les traicts avecq de la laque broyee avecq
huile dolif qui ne sechera poinct
Vernis blanc sur le plastre
Donne deulx ou trois mains de colle bien blanche pour
paindre Apres vernis de vernis de sandarache huile
daspic et un peu de mastic Et le mectre au soir dedans
un vaisseau tout ensemble bien pile sans foeu qui le
feroit venir jaulne puys avecq un pinceau il est sec
incontinent Coule lhuile qui aura pris la substance