042r - - - - - Fondeur
Le moule de terre se recuit jusques à estre quelque foys
comme rouge, car aultrement le metal saulteroit & ne feroit rien
de bon. Et mesmement le noyau de dedans doibt estre fort recuit
& meslé de pouldre de charbon.
Cire à cachet et empraincte
Pour les grands seaulx de cire, il fault avoir de
l’eau tiede tousjours preste & apre tenir ta cire dedans.
Mays plustot il la fault bien avoyr pestrie entre
les mains pour la rendre bien unie, car aultrement l’eau
qui se mectroit entre deulx l’empescheroit de s’unir. Aprés
tu en empraindras ce que tu vouldras et mectras trois
ou quattre papiers dessus, & avecq un baston tu uni &
arrondy comme un pilon, tu la rouleras comme si tu la voulois
polir, et elle s’attaquera au papier, qui t’aydera à
la relever du moule. Ainsy tu empraindras mieulx
que si tu la gectois fondue. Tu peulx tailler les figures
& les dorer, argenter & paindre de couleurs à vernis & les
raporter sur un fonds de verre painct de couleurs à
tourmentine & mastic. Et si tu veulx apliquer ces planches
par incrustation, fais le avecq gomme armoniac destrempée
avecq vinagre, et tu auras bonne colle.
Pour gecter de plastre
Fays fondre de la cire, & avecq une grosse broisse induis en le
relief dont tu veulx avoyr le cave, comme si le voulois paindre.
Et il se fera une crouste legere sur laquele qu, sur laquelle
tu gecteras tu du plastre, pour luy donner corps et force. Aprés,
dans le cave de la cire, tu gecteras aussy ton plastre pour
avoyr le relief, & il se despouillera fort facillement à cause
de la cire. Cela se practique plus pour les grands pieces
de relief entier que pour les aultres.