041r - - - - - Terre de gect pour les fondeurs
Elle se rend grace estant battue et meslée aussy de fient
de cheval. La terre des potiers seroict trop grasse et
se fendroict & ne tiendroit pas au foeu, mays il la fault
mesler de la moictié de sable, et de la quarte ou cinquiesme de fiens
de cheval.
Et la laisser seicher, puys la mectre en pouldre, puys la
tamiser pour la rendre subtile & purgée du gravier qui
empescheroit de gecter nect. Le fiens rend la terre plus amiable
& plus traictable, mays il fault qu’il soict bien nect de pailles &
aultres choses. Et quand la terre est grasse bien fort, il luy fault
donner plus de sable & plus de fiens. Mays il se trouve des terres
grasses meslées d’elles mesmes de sable. Si elles ne le sont, fais le par
artifice. Il fault tousjours recuire les terres plustost que jecter.
Lis de jardin
Si on le romp à sa premiere gecte & il ne reboutte & florist
que l’an suivant, & croy que les herbes bulbeuses font ainsy
.
Sable
Le sable doibt estre jecté pour gecter choisi, non pas si aride
qu’il n’aye poinct de prise, ne trop gras aussy. Et combien qu’il
s’en trouve de naturel, touteffois ce n’est pas partout. Et si
tu es en lieu qu’il ne s’en trouve poinct, tu le peulx composer. Mays
non pas avecq terre grasse, car le sable n’en veult aulcunement, car
elle faict soufler bien fort. Mays tu luy peulx donner liaison
avecq de la brique fort broyée sur le mable ou plastre ou albastre
calciné ou chose semblable ou moelle de corne de boeuf bruslée
ou aspalte bruslé parmy. Si tu le broyes bien subtillement sur
le porphire, il s adquiert prinse & puys tu le peulx brusler
avecq aspalte ou le mesler d’une quarte partye de tripoli. Garde
qu’il ne tumbe de pain dans ton sable, car cela faict fort
soufler.
at left middle margin
Essaye de mesler
du noir à noircy.
Canards
Les domestiques petits ne croissent d’un moys aprés qu’ilz sont
esclos, ains demeurent en cest estat. Mays aprés ilz croissent bientost,
mesmement s’ilz vont dans l’eau, on les nourrist avecq du grain de mil
bouilly leur esmiant parmy du pain et y espandant des laictues
fort hachées
.