041r - - - - - Terre de gect pour les fondeurs
Elle se rend grace estant battue et meslee aussy de fient
de cheval La terre des potiers seroict trop grasse et
se fendroict & ne tiendroit pas au foeu Mays il la fault
mesler de la moictie de sable et de la quarte ou cinquiesme de fiens
de cheval
Et la laisser seicher puys la mectre en pouldre puys la
tamiser pour la rendre subtile & purgee du gravier qui
empescheroit de gecter nect Le fiens rend la terre plus amiable
& plus traictable mays il fault quil soict bien nect de pailles &
aultres choses Et quand la terre est grasse bien fort il luy fault
donner plus de sable & plus de fiens @ Mays il se trouve des terres
grasses meslees delles mesmes de sable Si elles ne le sont fais le par
artifice Il fault tousjours recuire les terres plustost que jecter
Lis de jardin
Si on le romp a sa premiere gecte & il ne reboutte & florist
que lan suivant & croy que les herbes bulbeuses font ainsy
Sable
Le sable doibt estre jecte pour gecter choisi non pas si aride
quil naye poinct de prise Ne trop gras aussy Et combien quil
sen trouve de naturel Touteffois ce nest pas par tout Et si
tu es en lieu quil ne sen trouve poinct Tu le peulx composer Mays
non pas avecq terre grasse car le sable nen veult aulcunement car
elle faict soufler bien fort Mays tu luy peulx donner liaison
avecq de la brique fort broyee sur le mable ou plastre ou albastre
calcine ou chose semblable ou moelle de corne de boeuf bruslee
ou aspalte brusle parmy Si tu le broyes bien subtillement sur
le porphire il s adquiert prinse & puys tu le peulx brusler
avecq aspalte ou le mesler dune quarte partye de tripoly Garde
quil ne tumbe de pain dans ton sable Car cela faict fort
soufler
at left middle margin
Essaye de mesler
du noir a noircy
Canards
Les domestiques petits ne croissent dun moys apres quilz sont
esclos ains demeurent en cest estat Mays apres ilz croissent bien tost
mesmement silz vont dans leau On les nourrist avecq du grain de mil
bouilly leur esmiant parmy du pain et y espandant des laictues
fort hachees