040r - - - - - [continued]
gueres expert en la paincture. Si ta planche de verre
est emboutie comme prinse du ventre de quelque bocal, elle
s’en monstrera mieulx. Quand tu couches tes couleurs à tourmentine
sur tes planches de verre, pose les premierement sur un quarreau chault,
& comme elles seront eschaufées, estans tes couleurs & le laisse un peu sur
le quarreau, puys pose ta foeille d’estain.
Taincture
Aulcuns prenent la racine de lapathium acutum maius, qui semble
la rheubarbe des moynes ou vinette, & de la racine, qui est jaune
l’esté, ilz en taignent du filet & choses semblables.
Eau fort
Aulcuns mectent, sur pour quatre lb de matieres d’eau fort quattre
qui sont dans la cornue, quattre onces d’eau commune dans le
recipient, qui est mieulx que le mectre dans la cornue. On faict
deflegmer & calciner l’alum affin que l’eau n’aye pas tant de
feces. Plusieurs la font sans deflegmer l’alum.
Vinaigre
On tient pour asseuré que jec, faisant rougir du sel mineral qui
retire au mabre & qu’on appelle en Cataloigne & à la frontiere d’Espaigne
sel de Cardonne, & le jectant dans du tout rouge ou bien chault dans
du vin, qu’il le rend fort bon vinaigre. Aulcuns en font avecq de
l’eau mise sur la rappe aigrie aprés avoyr esté pressée des
vendangeurs, mays il n’est pas de durée & se gaste aulx chaleurs
& tonnerres.
Boutons de vermeilles
Pource que les vermeilles ne craignent point le foeu, on
les taille à losange plate d’un costé, puys on les joinct en
estoille dans paste d’esmail broyé, aprés on le parfond
& on dore l’esmail d’or de foeille, qu’on recuist.
Grottes
Pour remplir quelque lieu vuide qui ne peult pas estre
chargé de quelque roches pendant, on mect pres du
foeu un lopin de parchemin espés qui se retire & s’amoncele.
Puys on le painct à destrempe, puys à huile. Aprés on
l’aplique.