039v - - - - - Esmail
L’esmail prend plus volontiers sur le cuivre que sur l’argent.
Il est vray qu’il fault que la taille soict bien creuse & rude.
L’azur en corps & le rouge qu’on appelle gueule, l’esmailblanc
& le verd espés y prenent fort bien. Ayant esmaillé, on dore
les foeillages de la taille. Le cuivre a mesme durté à tailler
que l’argent fin ou l’or de pistolet.
Couleurs sur verre
d’enlumineure
Affin que tes couleurs à tourmentine ne s’espandent pas &
soient unies, mesle y avecq la tourmentine un peu de larme de mastic.
Trasser sur le verre quelque
histoire
Si tu veulx trasser sur le verre quelque histoire de taille
doulce, tu le peulx faire en plusieurs sortes. Pose ta table
de verre sur le plus tanvre que tu pourras sur l’histoire imprimée,
& ayant bien nettoyé le verre avecq lessive & cendre, de sorte qu’il
ne soict point gras, trasse sur les lignes qui te sont apparentes
avecq du noir à huile ou du noir d’escaille, avecq le pinceau, si tu
veulx paindre de couleurs en la façon que font les vitriers, qui
lavent leur table de verre de noir d’escaille & puys esgratignent &
descouvrent ce qu’ilz veulent coucher de couleur, laissant ce qui est
necessaire pour les umbres. Mays si tu veulx faire histoires
dorées sur le verre avecq fonds de couleurs qui imitent la taille
basse des orfevres, dore avecq eau gommée ou suc d’ail ou laict de
figuier toute ta planche de verre. Puys humecte entre deulx linges
mouillés ton histoire imprimée, & l’estends sur le verre doré.
Puys, avecq une espingle manchée au bout d’un petit baston, suys les
lignes de ton histoire comme si tu la voulois poncer, & ainsy tu la
trasseras naïfvement sur la doreure du verre. & aprés tu descouvriras
le fonds & ce qui doibt estre vuide avecq une aleine d’acier bien
poinctue & resuivras nettement les traicts & acompliras ton ouvraige
& feras tes visaiges & carnations d’argent moulu. Puys rempliras
le fonds d’azur d’esmail ou de verdegris ou de fine laque platte
platte destrempée avecq tourmentine clere meslée d’un peu de
larme de mastic si tu veulx que les couleurs soient plus unies & ne
s’espandent poinct. Aprés couche au dos du verre & sur les couleurs
une foeille d’estain blanche. Et cela sec, tu pourras couvrir de couleur
la foeille d’estain de pour cacher ton secret. La foeille d’estain
donne jour aulx couleurs. Ainsy tu pourras paindre sans estre
[continued]