039v - - - - - Esmail
Lesmail prend plus volontiers sur le cuivre que sur largent
il est vray quil fault que la taille soict bien creuse & rude
Lazur en corps & le rouge quon appelle gueule lesmail blanc
& le verd espes y prenent fort bien Ayant esmaille on dore
les foeillages de la taille Le cuivre a mesme durte a tailler
que largent fin ou lor de pistolet
Couleurs sur verre
denlumineure
Affin que tes couleurs a tourmentine ne sespandent pas &
soient unies mesle y avecq la tourmentine un peu de larme de mastic
Trasser sur le verre quelque
histoire
Si tu veulx trasser sur le verre quelque histoire de taille
doulce Tu le peulx faire en plusieurs sortes Pose ta table
de verre sur le plus tanvre que tu pourras sur lhistoire imprimee
& ayant bien nettoye le verre avecq lessive & cendre de sorte quil
ne soict point gras trasse sur les lignes qui te sont apparentes
avecq du noir a huile ou du noir descaille avecq le pinceau si tu
veulx paindre de couleurs en la facon que font les vitriers qui
lavent leur table de verre de noir descaille & puys esgratignent &
descouvrent ce quilz veulent coucher de couleur laissant ce qui est
necessaire pour les umbres Mays si tu veulx faire histoires
dorees sur le verre avecq fonds de couleurs qui imitent la taille
basse des orfevres Dore avecq eau gommee ou suc dail ou laict de
figuier toute ta planche de verre Puys humecte entre deulx linges
mouilles ton histoire imprimee Et lestends sur le verre dore
puys avecq une espingle manchee au bout dun petit baston suys les
lignes de ton histoire comme si tu la voulois poncer & ainsy tu la
trasseras naifvement sur la doreure du verre & apres tu descouvriras
le fonds & ce qui doibt estre vuide avecq une aleine dacier bien
poinctue & resuivras nettement les traicts & acompliras ton ouvraige
& feras tes visaiges & carnations dargent moulu Puys rempliras
le fonds dazur desmail ou de verdegris ou de fine laque platte
platte destrempee avecq tourmentine clere meslee dun peu de
larme de mastic si tu veulx que les couleurs soient plus unies & ne
sespandent poinct Apres couche au dos du verre & sur les couleurs
une foeille destain blanche Et cela sec tu pourras couvrir de couleur
la foeille destain de pour cacher ton secret La foeille destain
donne jour aulx couleurs Ainsy tu pourras paindre sans estre
[continued]