039r - - - - - Orfevre
Ils assemblent la limaille d’argent avecq du salpestre, qui
l’affine & ne l’aigrist poinct. Mays la limaille d’or s’assemble
avecq du borras, ou pour espargner le borras avecq du plomb,
qui affine l’or & l’adoucist, car le salpestre l’aigriroit, ce
qu’il ne faict pas l’argent. C’est pourquoy, pour espargne, les
orfevres en usent pour le rassembler affin d’espargner le
borras qui couste viii sols l’once & le salpestre x sols la lb.
Quand les orfevres ont ainsy assemblé leur limaille d’argent
avecq le salpestre, il se vitrifie au fonds du creuset un esmail
rouge. Je ne sçay si le cuivre meslé parmy l’argent en est cause
. Essaye pour l’esmail.
Pastel
Il se cultive enLauragués, où le fonds de la terre est si fertil
que tous les ans on y cultivoit le bled, il se coucheroict pour
estre trop gaillard. C’est pourquoy alternativement on y faict
du pastel puys du bled. Pour la culture du pastel, on laboure
la terre avecq des palles de fer comme les jardiners. Aprés avecq des
rasteaulx on l’esmotte & on la subtilie comme pour semer quelques
herbes potaigeres. On le seme communement à la saint Anthoine de
janvier. On en faict huict racoltes. Les premieres sont meilleures.
Le meilleur pastel de Lauragués est celuy de Carmail & celuy de
Auraigne. Et quelques foys le pastel est bon en un champ & en celuy
qui est proche il ne vauldra gueres. La bonté du pastel se cognoist
quand estant mis en la bouche il rend goust comme de vinaigre, ou
quand en l’esmiant & rompant il ha quelque veines comme moisies qui
sont comme dorées ou argentées. On l’espreuve à la cuve des tinturiers,
et pour en charger une cuve il en fault six balles. Là on y teint
plusieurs floquets de laine, et s’il tainct quinze fois il est dict
estre de quinze florins, s’il donne xx tainctures, de xx florins.
Le bon tainct jusques à 30 foys & communement jusques à xxv ou 26.