039r - - - - - Orfevre
Ils assemblent la limaille dargent avecq du salpestre qui
laffine & ne laigrist poinct Mays la limaille dor sassemble
avecq du borras ou pour espargner le borras avecq du plomb
qui affine lor & ladoucist Car le salpestre laigriroit ce
quil ne faict pas largent Cest pourquoy pour espargne les
orfevres en usent pour le rassembler affin despargner le
borras qui couste viii sols lonce & le salpestre x sols la lb
Quand les orfevres ont ainsy assemble leur limaille dargent
avecq le salpestre il se vitrifie au fonds du creuset un esmail
rouge Je ne scay si le cuivre mesle parmy largent en est cause
Essaye pour lesmail
Pastel
Il se cultive en lauragues ou le fonds de la terre est si fertil
que si tous les ans on y cultivoit le bled il se coucheroict pour
estre trop gaillard Cest pourquoy alternativement on y faict
du pastel puys du bled Pour la culture du pastel on laboure
La terre avecq des palles fer comme les jardiners Apres avecq des
rasteaulx on lesmotte & on la subtilie comme pour semer quelques
herbes potaigeres On le seme communement a la saint Anthoine de
Janvier on en faict huict racoltes Les premieres sont meilleures
Le meilleur pastel de lauragues est celuy de carmail & celuy de
auraigne Et quelques foys le pastel est bon en un champ & en celuy
qui est proche il ne vauldra gueres La bonte du pastel se cognoist
quand estant mis en la bouche il rend goust comme de vinaigre Ou
quand en lesmiant & rompant il ha quelque veines comme moisies qui
sont comme dorees ou argentees On lespreuve a la cuve des tinturiers
Et pour en charger une cuve il en fault six balles La on y teint
plusieurs floquets de laine Et sil tainct quinze fois il est dict
estre de quinze florins sil donne xx tainctures de xx florins
Le bon tainct jusques a 30 foys & communement jusques a xxv ou 26