Making and Knowing
A minimal edition of BnF Ms Fr 640

[TOC] | [translation]

- - - - - folio image: 038v - - - - -

Couleur noire pour taindre

Prens lessive de chaulx vive & litharge mesle & destrempe
& tu feras taincture tanee & la reiterant tu feras noir
Essaye daultres couleurs avecq la lessive de chaulx

Contre seignee du nes
et pour taincture

Pile de ceste espece de vinete ou lapathum acutum qui est vene
de rouge quon appelle sang de dragon Et laplique de sur le
front de celuy qui seigne Ceste herbe a force taincture & faict
beau violet

Beaulx artichaulx

Il les fault espurger tous les ans de sorte quil ny
demeure quun pied & les arrouser fort L En replanter
aussy tous les ans car la seconde annee ilz porteront
fort beau fruit

Planter abres

On dict que rarement labre plante le jour de Saint paul
fault aprendre @& pour couvrir les ampeaulx lafiente de
bœuf
est fort propre pource quelle ne se deffaict point a la pluye
comme la terre

Marchant

Ceulx qui vendent par le menu les velours & es aultres
estoffes ne font poinct de livre double pource que vendant
par le menu & en detail ce leur seroict trop de pene Ilz
ont seulement leur lb de vente & leur livre de raison Mays
ceulx qui vendent en gros & ceulx qui trafiquent de pastel
ont double livre

Escarlates

Pource que laulne couste a taindre sept ou huict lb
Ils y employent des draps de sept ou huict frans laulne
Mays qui en veult avoir de belle se la quil achepte du
drap blanc de quinze frans laulne & la face taindre
avecq pastel pur descarlatte & un peu de cochenille Le
drap noir se trouve fort fin pource que la taincture est
a bon marche