038r - - - - - Saphir
Il se trouve des saphirs qu’on appelle de treille, pource qu’ils sont
percés et qu’on dict que certain roy en avoict faict certain ornement en forme
de treille, comme seroict peult estre l’escran de Charlemaigne, ainsy nommé, au
tresor de Saint Denis, où les pierreries sont mises en œuvre sans foeille, affin
d’en avoyr la jouissance du jour d’une part & d’aultre & pour monstrer
leur naïfveté. J’en en ay un blanc qui semble estre brut & percé, et est mouschetté
de tasches bleues partout. J’ay opinion qu’elles soient artificielles & qu’elles soient
de taffre ou d’esmail azuré fort cler parfondu sur le saphir. La lime y
mort comme sur le beril.
Safran
Il se contrefaict & s’augmente avecq des foeilles de soucy à demy seiches
& retorses comme un fil & mises à seicher au plus chault soleil, & se mesle,
& ledict soucy donne mesme quelque taincture.
Saphir
Les tailleurs de pierre quelques foys choisisent de vieux lopins de vittres
antiques aulx fenestrages des eglises, qui sont beaucoup plus espesses
que celles d’aujourd’huy & sont de plus naïfves couleurs. Si c’est pour souf
saphir, ilz choisisent de beau bleu & de tel endroict qu’il n’y aye point de pieces grains,
s’il est possible. Et l’ayant couppé en quarré avecq l’esmery, il le taillent
à biseaulx & le polissent. Et en ceste sorte, ilz contrefont de tres beaulx
saphirs. @ Le vieulx esmail d’azur pour argent tirant sur l’eau marine estoit
fort propre pour contrefaire des saphirs, mays il ne s’en
trouve guere. On contrefaict des eaulx marines avecq du verre blanc, mays ilz
le prenent au cul du verre.
Ambre
La couleur orangée qui est à l’ambre transparent et à l’aultre qui a
corps n’est pas interieure, car par dedans il est blanchastre. Mays
par viellesse il ou en le portant, il adquiert ceste crouste rousse. C’est
pourquoy ceulx qui le taillent avecq la lime ou sur la roue n’ostent poinct,
s’il est possible, ceste crouste. Ains seulement le polissent, le frottant
avecq un baston de saul ou aultre bois dous saulcé dans de l’eau &
saulpouldré de tripoli de Bretaigne, et il prend beau polyment. S’il est
trop jaulne paille & que tu luy veuilles augmenter la couleur, pendés le
au dedans d’une cheminée où il aye force suye & fumée, et il prendra
couleur rousse orangée. Essaye de prendre le plus blanchastre transparent,
et le mects verdir sous le fient comme les os. Ou bien fais le fumer
en lieu clos, à la fumée du safre ou du manganese & aultres drogues
que tu sçais. Ou dans urine & vinaigre distillé meslé de couleurs, ou à la
vapeur d’eau fort bouillant dans du cuivre, ou eau fort bouillant avecq
de l’argent & sel armoniac & Aulcuns taillent l’ambre à faces sur
une roue de bois dous avecq de la potée au lieu d’esmery, & le jayet aussy.
Le sel appellé de Langlois de armonic est sel mineral qui semble pierre de
mabre, et est mineral fort dur à grands pieces comme celuy de Cardonne &
Monserrat.
at left bottom margin
J’ay experimenté
que le faisant
bouillir en lexive
ou eau corrosive,
il devient roux
en la superficie.
Et s’il est frotté
contre du sapin &
boix douls plustost
qu’estre refroidi, il se taille aysement.