038r - - - - - Saphir
Il se trouve des saphirs quon appelle de treille pource quils sont
perces et quon dict que certain roy en avoict faict certain ornement en forme
de treille comme seroict peult estre lescran de charlemaigne ainsy nomme au
tresor de Saint denis ou les pierreries sont mises en œuvre sans foeille affin
den avoyr la jouissance du jour dune part & daultre & pour monstrer
leur naifvete Jen en ay un blanc qui semble estre brut & perce et est mouschette
de tasches bleues par tout Jay opinion quelles soient artificielles & quelles soient
de taffre ou desmail azure fort cler parfondu sur le saphir la lime y
mort comme sur le beril
Safran
Il se contrefaict & saugmente avecq des foeilles de soucy a demy seiches
& retorses comme un fil & mises a seicher au plus chault soleil & se mesle
& ledict soucy donne mesme quelque taincture
Saphir
Les tailleurs de pierre quelques foys choisisent de vieux lopins de vittres
antiques aulx fenestrages des eglises qui sont beaucoup plus espesses que
celles daujourdhuy & sont de plus naifves couleurs Si cest pour souf
saphir ilz choisisent de beau bleu & de tel endroict quil ny aye point de pieces grains
sil est possible Et layant couppe en quarre avecq lesmery il le taillent
a biseaulx & le polissent Et en ceste sorte ilz contrefont de tresbeaulx
saphirs Le vieulx esmail dazur pour argent tirant sur leau marine estoit
fort propre pour contrefaire des saphirs mays il ne sen
trouve guere On contrefaict des eaulx marines avecq du verre blanc mays ilz
le prenent au cul du verre
Ambre
La couleur orangee qui est a lambre transparent et a laultre qui a
corps nest pas interieure Car par dedans il est blanchastre Mays
par viellesse il ou en le portant il adquiert ceste crouste rousse Cest
pourquoy ceulx qui le taillent avecq la lime ou sur la roue Nostent poinct
sil est possible ceste crouste Ains seulement le polissent le frottant
avecq un baston de saul ou aultre bois dous saulce dans de leau &
saulpouldre de tripoly de bretaigne Et il prend beau polyment Sil est
trop jaulne paille & que tu luy veuilles augmenter la couleur pendes le
au dedans dune cheminee ou il aye force suye & fumee Et il prendra
couleur rousse orangee Essaye de prendre le plus blanchastre transparent
Et le mects verdir sous le fient comme les os Ou bien fais le fumer
en lieu clos a la fumee du safre ou du manganese & aultres drogues
que tu scais Ou dans urine & vinaigre distille mesle de couleurs ou a la
vapeur deau fort bouillant dans du cuivre ou eau fort bouillant avecq
de largent & sel armoniac & Aulcuns taillent lambre a faces sur
une roue de bois dous avecq de la potee au lieu desmery & le jayet aussy
Le sel appelle de langlois de armonic est sel mineral qui semble pierre de
mabre et est mineral fort dur a grands pieces comme celuy de cardonne &
monserrat
at left bottom margin
Jay experimente
que le faisant
bouillir en lexive
ou eau corrosive
il devient roux
en la superficie
Et sil est frotte
contre du sapin &
boix douls plustost
questre refroidi
il se taille aysement