037v - - - - - Jardinier
Pour bien semer les melons, il fault que ce soict à la fin de la
lune, car aultrement ilz boutteroient trop de foeilles & ne raporteroient
pas tant de fruict. Fays de deux doits en deulx doigts de petites
trous avecq un piquet, & mects en chascun deulx ou trois graines.
Aprés, ayes de la terre fort deliée & remplis en legerement les
fossettes. Aprés, espands sur tout l’espesseur d’un pousse d’havets,
c’est à dire balle de fl bled, affin que la pluye survenant
ne batte poinct la terre & n’empesche leur naissance. Les havets
attirent les rats mulots, qui mangent les graines. Et pour obvier à cela,
ilz les fault mouiller de s decoction d’absinthe.
Vitrier
Aulcuns ne chargent poinct de gris d’escaille le verre pour
travailler d’aprest, ains trassent sur le verre net avecq
du noir à huile. Mays il fault bien que le bois soit
desgraissé, car s’il a tant soit peu de graisse, la couleur
n’y prendra aulcunement. Et mesme, si le vitrier qui travaille
a puanteur de nés ou de bouche la, & qu’il alene sur le verre,
la couleur n’y prandra point. Ceulx qui ont trouvé
l’invention de travailler en petite besoigne d’esmaulx attandris
n’employent que l’esmail d’azur, qui est le bleu, & l’esmail
colombin, qui est coleur de pourpre, lesquels ilz attendrissent
avecq de la rocaille ou verre de plomb. Quand au jaulne,
ilz le font d’argent, le rouge de sanguine comme est dict ailleurs,
le noir & gris & umbres avecq le noir d’escaille ou fort,
ou foible, la carnation avecq la sanguine claire. Le
vert se faict premierement de jaulne, puys dessus ilz couchent
de l’esmail d’azur ou fort ou foible, selon qu’ilz veulent
faire gay ou obscur.
Ambre jaulne
Il se taille aveq la lime, puys on passe un certain sel pulverisé par
dessus, qu’un Anglois apelloict desramonet. Mays je cuide que cela estoit
ponce pulverisée, car elle avoict asperité d’arene. Et avecq une corde tendue
il polissoit son ambre, puys y passoit du tripoli de Bretaigne avecq
le doigt, d’aultres avecq un cuir ou une cane. L’ambre perd sa
couleur si quelque personne mal saine le porte, & devient blanchastre.
Mays pour le remettre, il le fault faire tremper une nuict dans
de l’urine puys le faire bouillir un peu dedans.