Making and Knowing
A minimal edition of BnF Ms Fr 640

[TOC] | [translation]

- - - - - folio image: 037v - - - - -

Jardinier

Pour bien semer les melons il fault que ce soict a la fin de la
lune
Car aultrement ilz boutteroient trop de foeilles & ne raporteroient
pas tant de fruict Fays de deux doits en deulx doigts de petites
trous avecq un piquet & mects en chascun deulx ou trois graines
Apres ayes de la terre fort deliee & remplis en legerement les
fossettes Apres espands sur tout lespesseur dun pousse dhavets
cest a dire balle de fl bled Affin que la pluye survenant
ne batte poinct la terre & nempesche leur naissance Les havets
attirent les rats mulots qui mangent les graines Et pour obvier a cela
ilz les fault mouiller des decoction dabsinthe

Vitrier

Aulcuns ne chargent poinct de gris descaille le verre pour
travailler daprest Ains trassent sur le verre net avecq
du noir a huile Mays il fault bien que le bois soit
desgraisse car sil a tant soit peu de graisse la couleur
ny prendra aulcunement Et mesme si le vitrier qui travaille
a puanteur de nes ou de bouche la & quil alene sur le verre
la couleur ny prandra point Ceulx qui ont trouve
linvention de travailler en petite besoigne desmaulx attandris
Nemployent que lesmail dazur qui est le bleu & lesmail
colombin
qui est coleur de pourpre Lesquels ilz attendrissent
avecq de la rocaille ou verre de plomb Quand au jaulne
ilz le font dargent Le rouge de sanguine comme est dict ailleurs
Le noir & gris & umbres avecq le noir descaille ou fort
ou foible La carnation avecq la sanguine claire Le
vert se faict premierement de jaulne puys dessus ilz couchent
de lesmail dazur ou fort ou foible selon quilz veulent
faire gay ou obscur

Ambre jaulne

Il se taille aveq la lime puys on passe un certain sel pulverise par
dessus quun anglois apelloict desramonet Mays je cuide que cela estoit
ponce pulverisee car elle avoict asperite darene Et avecq une corde tendue
il polissoit son ambre puys y passoit du tripoli de bretaigne avecq
le doigt Daultres avecq un cuir ou une cane Lambre perd sa
couleur si quelque personne mal saine le porte & devient blanchastre
Mays pour le remettre il le fault faire tremper une nuict dans
de lurine puys le faire bouillir un peu dedans