036v - - - - - Fondeur
Les pots de cuisine se font bons pour ne donner poinct
mauvays goust a la viande avecq du mesme metal duquel
les cloches se font Il est vray que pour les rendre plus
vendables les fondableseurs y meslent plus de letton pourcequilz
sont plus jaulnes Mays le letton de soymesme & a son seul
attouchement est puant & de mauvaise odeur
Le letton ne perd point ou bien peu sa calamine au four a vent
quand il se fond au creuset ne gueres au four a boys Mays
bien au four a souflets pourceque les souflets donnent
feu de chasse
Four a vent
Il fault quil soict plus estroit a la gueule quau fonds
Et cest asses que le creuset puisse entrer dedans & quil y
aye espasse pour le retirer & prendre avecq les tenailles
Verre de vitriers
On dict quen lorraine & en flandres le verre de bien
se faict de cendre de feugiere & de caillous Et que
premierement ilz souflent une longue vessie laquelle
un aultre ouvrier avecq de longues forces fend & couppe
tout du long Puys ayant pose ceste longue vessie fendue
sur une pierre ou platene large qui est dans le four
un peu moings chault que de la fonte Elle se laisse
dilater Et encores oultre ce ilz laplanissent avecq une
longue & grosse verge de fer ronde Puys la retirent
au four a recuire Il sen faict de mesme en angleterre
de plus beau Aupres de rouan en France Le verre de
plat se faict avecq sel de salicor & caillous qui est plus
blanc & plus tendre que cestuy de lorraine Car le verre
de plat se peult fondre a la chandelle & non pas cestuy de
lorraine Celuy de plat se soufle en longue vessie de
laquelle un aultre coupe le bout puys le soufleur en
tournant laplatise & en touchant sur un plan qui est a terre
A puys la met a recuire Ainsy le milieu par ou elle se
commance demeure tousjours
at left middle margin
Le verre se peult
refendre avecq la
lumiere dune chandelle
en mouillant Mays
non pas si justement
quavecq le fer chault