035v - - - - - Pour garder quelqu’un de ne
manger d’une viande
Faictes seicher de la racine de pied de veau, aultrement
jarus, & en saulpouldrés la viandes. À quoy il n’y a
poinct de dangier. Voy Mathiol.
Pour fayre transmuer du bled
d’un vaisseau à aultre
Figure at left middle margin
Ayes deulx petits boisseaulx de boys de pareille grandeur
qui soyent par le dehors du fonds caves de l’espesseur
d’un dos de cousteau ou plus. L’un d’iceulx demeurera vuide
& au fonds de l’aultre tu colleras des grains de bled avecq
de l’amydon de sorte qu’il soict tout couvert de grain & il
semblera en estre plein. Ayes aussy une cloche de boys,
dans laquelle tu mectras aultant de grain qu’il en pourra
demeurer en la capacité d’un des boisseaulx, et par dessus mects
une piece de cuir simple qui entre justement dans la cloche. Mects
tout dans un sac ou serviette ou mouchouer plié, si tu ne veulx
employer la gibessiere de maistre gonin. Montre premierement le
boisseau vuyde, puys en presence emplis le de grain, puys
remects le dans la serviette. Aprés laisse y cestuy là &
prends celuy où est collé le bled avecq amydon, & il semblera
que ce soict le premier remply de bled. Mects le soubs un
chapeau & pose doulcement la cloche sur la table pour la
premiere foys, et si tu veulx, monstre promptement & sans
arrester le fonds qui sera couvert de cuir blanc de la couleur
du boys. Puys faisant semblant de monstrer le
boisseau qui est soubs le chapeau, tu le tourneras
dextrement du costé qu’il est vuyde & le laisseras couvert.
Puys commanderas que par invisibilium le bled passe
dans la cloche, de laquelle tu fraperas un peu auparavant
sur la table un peu fort, & le bled tumbera au fonds &
couvrira la piece de cuir. Puys leve le chapeau,
le boisseau semb se trouvera vuide et la cloche plene
de bled, que tu racleras dextrement avecq la piece de cuir.
[continued]